Tume inatakiwa kuamua rufaa ya mtumishi ndani ya Siku 90 tangu kupokelewa kwa rufaa husika kama kila mdau ametimiza wajibu wake. Ucheleweshaji wa kuamua rufaa unaweza kusababishwa na Mamlaka ya Nidhamu kuchelewesha kuwasilisha vielelezo Tume. Ili haki ya msingi kati ya mrufani na mrufaniwa ni lazima vielelezo vyote viwepo ili kuweza kutoa uamuzi wa haki.

Wajibu wa Mtumishi ni kujua haki yake ili isipotee pale ambapo anaona hajatendewa haki katika masuala yake ya kiutumishi na kuwasilisha Rufaa yake kwa Mamlaka husika kwa muda uliowekwa Kisheria. Mtumishi anatakiwa kuwasilisha Rufaa Tume ndani ya muda usiozidi siku 45 tangu alipopokea barua ya uamuzi kutoka katika Mamlaka ya Nidhamu. (Kwa mujibu wa Kanuni ya 61 (1) ya Kanuni za Utumishi wa Umma za mwaka 2003). Aidha, hata masuala ya malalamiko yana muda maalum wa kuwasilishwa Tume, kwa mujibu wa Kanuni Q. 19 ya Kanuni za Kudumu za utumishi wa umma za mwaka 2009 anatakiwa awasilishe ndani ya kipindi cha mwaka mmoja.

Kwa mujibu wa Sheria ya Utumishi wa Umma na Kanuni zake Mamlaka ya Nidhamu ina wajibu wa kuwasilisha Vielelezo vyote vilivyotumika katika mchakato wa kumchukulia hatua za nidhamu Mtumishi hadi pale uamuzi unapotolewa. Kwa mujibu wa Kanuni 61 (3) iko wazi kwamba, pale Mamlaka ya Nidhamu imepata nakala kutoka kwa mrufani ama Mamlaka ya Rufaa ndani ya siku 14 inatakiwa iwasilishe vielelezo kwa Mamlaka ya Rufaa. Tume ya Utumishi wa Umma imepewa Mamlaka za kuwataka Waajiri wawasilishe taarifa zote ambazo Tume itazihitaji kwa ajili ya kutekeleza majukumu yake.